Á aðalfundi Heimils og skóla, þann 28. apríl 2006, var samþykkt ályktun um að samræmd próf verði tekin til endurskoðunar. Ályktunin hljóðar svo:

"Aðalfundur Heimilis og skóla telur rétt að í þeirri vinnu sem nú er hafin við heildarendurskoðun grunnskólalaga að samræmd próf í grunnskóla verði tekin til gagngerrar endurskoðunar. Foreldrar leggja áherslu á að til að hægt sé að mæta ólíkum þörfum nemenda fyrir námi þurfi skólastarf í framtíðinni að verða enn sveigjanlegra sem aftur kallar á minni miðstýringu og einfaldari aðalnámsskrá. Skólakerfið færist sífellt meira í átt að einstaklingsmiðuðu námi og samræmd próf setja slíku starfi töluverðar skorður. Foreldrar telja að prófin í þeirri mynd sem nú tíðkast stýri um of skólastarfinu, hamli framþróun og tryggi ekki öllum börnum jafnan aðgang að námi á framhaldsskólastigi. Ef litið er á skólastigin þrjú sem eina heild eru samræmd próf óþörf."

Á aðalfundi SAMFOK, 31. maí 2006, var eftirfarandi ályktun samþykkt:

,,Aðalfundur SAMFOK (samband foreldrafélaga og foreldraráða í grunnskólum Reykjavíkur) haldinn að Suðurlandsbraut 24 þann 31. maí 2006 telur að samræmd próf í þeirri mynd sem við þekkjum í dag séu eðlilegur hluti af námsmati og nauðsynleg til að eiga möguleika á samanburði af ýmsu tagi. Mikilvægt er að umræðan í samfélaginu um námsmat sé lifandi, m.a. um það hvað samræmd próf mæla. Það er á ábyrgð grunn- og framhaldsskóla og foreldra hvaða vægi samræmd próf hafa í skólastarfinu og hversu stýrandi þau eru í starfinu. Þegar framhaldsskólar meta nemendur sem sækja um skólavist eiga þeir að mati aðalfundar SAMFOK 2006 annars vegar að taka mið af margþættu mati grunnskólans á fjölbreytilegum hæfileikum nemendanna og hins vegar af niðurstöðum samræmdra prófa. Þessir þættir ættu að vega jafn þungt.

Aðalfundur SAMFOK telur afar mikilvægt að auka fjölbreytni í námsmati grunnskólanna. Námsmat á að endurspegla hæfileika og getu grunnskólanema á sem flestum sviðum. Eðlilegt er að inn í það mat sé tekin færni á öðrum sviðum en í bóknámi. Nemendur sem standa sig vel í list- og verkgreinum, íþróttum, félagslífi, skák, Skrekk og svo mætti lengi telja eiga að njóta þess í slíku mati.

Þegar gæði skólastarfs eru metin er mikilvægt að ekki sé einblínt á niðurstöður samræmdra prófa. Menntasvið Reykjavíkurborgar hefur um árabil látið kanna líðan nemenda í grunnskólum borgarinnar og viðhorf foreldra til skólastarfsins. Jafnframt hefur starfsánægja starfsfólks grunnskólanna verið könnuð reglulega. Allar þessar kannanir eru mikilvægar í mati á gæðum skólastarfsins og eiga að skoðast samhliða samræmdum prófum og margþættu námsmati.”

Björgvin G. Sigurðsson alþingismaður skrifaði grein, sem birtist í Morgunblaðinu þann 10. júní 2006, þar sem hann leggur meðal annars til að samræmd lokapróf 10. bekkjar verði aflögð.

Finnur Torfi Hjörleifsson gagnrýndi samræmt próf í íslensku, í grein sem birtist í Morgunblaðinu þann 7. júní með fyrirsögninni: “Svona á ekki að semja próf”.

Júlíus K. Björnsson, forstöðumaður Námsmatsstofnunar, skrifaði grein sem birtist í Morgunblaðinu 29. júní 2006. Í inngangi segir; "Gagnrýni á samræmd próf hefur verið áberandi í fjölmiðlum undanfarið. Tilgangur þessa pistils er að svara nokkrum þeirra atriða sem fram hafa komið og sum hver byggjast á misskilningi eða ákaflega þröngri túlkun á tilgangi þessara prófa."

Á vef Námsmatsstofnunar má m.a. finna bækling um gerð og framkvæmd samræmdra prófa og minnisblað varðandi gagnrýni á samræmd próf.

Aftur til baka í fréttir