FULLTRÚARÁÐSFUNDUR SAMKÓP

haldinn mánudaginn 5. febrúar 2007 kl. 19:30 í Kársnesskóla v. Vallargerði

Fundarmenn voru frá:

Digranesskóla: Reynir Stefán Gylfason (FR), Auður Gunnarsdóttir (FF/FR), Arndís Arnardóttir (FR) og Hólmfríður Einarsdóttir (FF)
Hjallaskóla: Dóra Gunnarsdóttir (FF) og Hrefna Gunnarsdóttir (SAMKÓP)
Hörðuvallaskóla: enginn (þar sem einhver brotalöm var í fundarboði SAMKÓP til fulltrúa Hörðuvallaskóla)
Kársnesskóla: Ragnheiður Jónsdóttir (FF) og Christer Magnusson (FR)
Kópavogsskóla: Guðrún Atladóttir (FF) og Jón Ólafur Halldórsson (FR)
Lindaskóla: Pétur Valdimarsson (FR/SAMKÓP)
Salaskóla: enginn, en fulltrúar FR sendu ábendingar sínar fyrir fundinn
Smáraskóla: Erlendur Geirdal (FF/SAMKÓP), Ingibjörg Birna Ólafsdóttir (FR), Herdís Dröfn Fjeldsted (FR) og Geirlaug B. Geirlaugsdóttir (FR)
Snælandsskóla: Rannveig Ásgeirsdóttir (FF/SAMKÓP) kom að loknum skólanefndarfundi
Vatnsendaskóla: enginn

Umræðuefni fundarins var skólastefna Kópavogsbæjar. Í fundarboðum til foreldrafélaga (FF) og foreldraráða (FR) (23. janúar og 1. febrúar) var greint frá því að farið yrði yfir gildandi stefnumótun í málefnum grunnskóla Kópavogs, hún rædd og mótaðar athugasemdir fyrir fund sem skólanefnd Kópavogs stendur fyrir þann 24. febrúar. Núgildandi skólastefna og bréf skólanefndar frá 19. janúar fylgdi fundarboði sem viðhengi. Vísað var til málefnasamnings um meirihlutasamstarf í bæjarstjórn Kópavogs fyrir kjörtímabilið 2006-2010 og vísað er til í frétta 15. júní 2006 á heimasíðu SAMKÓP. Jafnframt var sett frétt á heimasíðu SAMKÓP þann 24. janúar 2007 þar sem boðað var til fundarins auk þess sem þar mátti finna tengla í núgildandi skólastefnu, málefnasamning, skólastefnu Garðabæjar og önnur skjöl.

Fundarmönnum var skipt upp í 3 hópa. Hver hópur fór yfir núgildandi skólastefnu m.t.t. meginverkefna undir málaflokknum „Grunnskólar og framhaldsskólar“ í málefnasamningi frá fundi bæjarstjórnar Kópavogs þann 13. júní 2006. Hóparnir höfðu jafnframt athugasemdir sem fulltrúar FR Salaskóla höfðu sent til SAMKÓP fyrir fundinn.

Fundarmenn voru sammála að í núgildandi skólastefna væri margt gott að finna en hins vegar væri ljóst að ekki hefði náðst að framfylgja henni. Hún væri of löng og nauðsynlegt að byggja hana á færri punktum sem væru mælanlegir og hægt væri að fylgja eftir með framkvæmdaáætlun á kjörtímabilinu. Þá var jafnframt á það bent að ýmis atriði í núgildandi skólastefnu væru bundin í lögum og því óþarfi að geta þeirra sérstaklega í skólastefnunni.

Umræða hópanna snéri að eftirtöldum atriðum – athugið að þeim er ekki raðað með tilliti til mikilvægis þeirra:

Dægradvöl / tómstundir / „Kópavogsstrætó” - Rætt um mikilvægi þess að mótuð verði heildstæð stefna, sem taki mið af framkvæmd á öðrum Norðurlöndum, varðandi Dægradvöl við grunnskóla Kópavogs í samvinnu við ÍTK og íþrótta- og tómstundafélög í bænum. Mikilvægt að tengja tómstundir við skólahverfi t.d. með Kópavogsstrætó (hugmynd sem oft hefur skotið upp kollinum m.a. á síðasta íbúaþingi) þ.e. hringakstur um Kópavog milli skóla, tómstunda- og íþróttamannvirkja. Á fulltrúaráðsfundi SAMKÓP í janúar var m.a. á það bent að við síðustu breytingar á leiðarkerfinu urðu þær breytingar að börn frá Vatnsenda þurfa að ganga frá Digranesheiði upp að Digranesskóla oft á tíðum með fyrirferðarmiklar hljóðfæratöskur.

Hollusta / matarmál - Rætt um mikilvægi þess börnin fái hollan og vel samsettan mat í skólanum. Í því sambandi var talið mikilvægt að í skólum Kópavogs starfi kokkar sem eldi fyrir nemendur og starfsmenn. Jafnframt mikilvægt að kennarar/starfsmenn og allir nemendur, bæði þeir sem eru í mataráskrift og einnig þeir sem koma með nesti, snæði saman. Í Salaskóla hefur tilraunaverkefni verið í gangi þar sem kokkur eldar skólamatinn og heyrst hefur að það hafi gefið mjög góða raun.

Kennarar og aðrir starfsmenn- Tryggt verði að allir sem sinni kennslu við grunnskóla Kópavogs séu með tilskilin réttindi og jafnframt að sérhæfing kennara fái að njóta sín, t.d. að kennari með sérmenntun í ensku kenni ensku en ekki stærðfræði. Jafnframt var rætt um mikilvægi þess að allir starfsmenn tali íslensku og þekki vel til íslenskrar menningar og gilda. Tungumálaerfiðleikar erlendra starfsmanna og mismunandi menningarbakgrunnur hefur í mörgum tilfellum valdið misskilningi í samskiptum þessara starfsmanna og barnanna og þau eru sögð sýna útlendingunum oftar ókurteisi en íslensku skólastarfmönnum.

Eftirlit / mælingar / úrvinnsla upplýsinga og dreifing - Rætt um mikilvægi þess að bæjaryfirvöld efli eftirlit með skólunum, því þrátt fyrir sjálfstæði þeirra þarf öflugt eftirlit ætíð að vera til staðar. Vinna þarf markvisst að söfnun upplýsinga og niðurstöðum/samanburði dreift aftur til skólanna og hagsmunaaðila, t.d. foreldraráða. Jafnframt þarf eftirlit með störfum foreldraráða að vera til staðar.
Í dag er algengt að fólk velji sér búsetu með tilliti til skólahverfis. Foreldrar og nemendur eru neytendur og þurfa að hafa greiðan aðgang að upplýsingum um þá „vöru” sem er í boði. Mikilvægt að slíkar upplýsingar séu aðgengilegar á heimasíðum skólanna. Meðal upplýsinga sem gott væri að hafa aðgengilegar eru t.d. upplýsingar um menntun kennara og fjölda nemenda í bekkjardeildum grunnskóla í Kópavogi. Einnig væri æskilegt að Kópavogsbær setti sér ákveðið viðmið varðandi þak á nemendafjölda einstakra bekkja – t.d. að aldrei væru fleiri en 22 í 3. – 10. bekk nema til komi sérstakur stuðningur. Í 1. og 2. bekk yrði viðmiðið lægra t.d. 18 nemendur.

Virkja mátt foreldra: - Mikilvægt að efla upplýsingagjöf til foreldra og gefa þeim fleiri tækifæri til að hafa áhrif. Jafnframt er mikilvægt að foreldrar axli ábyrgð og gefi sér tíma til að taka þátt í skóla- og foreldrasamstarfinu. Foreldrar geta t.d. komið að lífsleiknikennslu sem gæti verið í formi starfskynningar og/eða kynningar á áhugamálum, fjármálafræðslu o.fl. Rætt um skólastefnu Garðabæjar þar sem ákveðinn starfsmaður sinnir samstarfi við foreldra auk þess sem skólinn styður sérstaklega við gerð foreldrarsamninga.

Fjárframlög til skóla – aðbúnaður í skólum - gamlir/nýir skólar: Rætt um mikilvægi þess að nemendum sé ekki mismunað varðandi aðbúnað í skólunum. Talið nauðsynlegt að endurskoða hvernig framlög til skóla eru ákvörðuð m.t.t. endurbóta á skólahúsnæði og búnaði. Jafnframt er mikilvægt að skilgreina hvað telst til stofnbúnaðar skóla. Húsnæðismál eldri skóla voru mikið rædd og nauðsyn þess að tryggja að þeir sitji ekki eftir hvað varðandi endurbætur á húsnæði og húsbúnaði. Jafnframt er mikilvægt að reynt sé að hraða sem mest uppbyggingu skóla í nýjum hverfum og koma í veg fyrir að uppbygging þeirra taki marga áratugi

Sjálfsstyrking - Kennd sé markvisst sjálfsstyrking, framsögn og tjáning í grunnskólum bæjarins.

Framþróun í skólum – t.d. í tengslum við upplýsingatækni - Rætt um mikilvægi þess að ekki séu settar reglur sem standi í vegi fyrir eðlilegri framþróun í grunnskólunum. Í þessu sambandi var nefnt bann við því að setja hljóðkort í tölvur Kópavogsbæjar. Jafnframt veltu fundarmenn fyrir sér hvort og þá hvernig þessu banni væri fylgt eftir og hvort „löghlýðnir” skólar sætu eftir.

Ákveðið að fá skólana til að senda öllum foreldrum tilkynningu í gegnum Mentor þar sem kynnt verður fyrirhuguð endurskoðun á skólastefnu Kópavogs og þeir hvattir til að koma ábendingum til SAMKÓP. Jafnframt verði athugasemdir vinnuhópsins kynntar fyrir foreldrum.

Ákveðið að hver skóli skipi sinn fulltrúa fyrir fund skólanefndar sem haldinn verður laugardaginn 24. febrúar.

Að lokum var fulltrúum Kársnesskóla þakkað fyrir góða fundaraðstöðu.

Fundi var slitið kl. 21:45.

Til baka í fundargerðayfirlit