Samkóp - Samtök foreldrafélag og foreldraráða í Kóapvogi

Aðalfundur SAMKÓP 2005

haldinn fimmtudaginn 29. nóv. 2005 í Snælandsskóla

1. Fundur settur
Jón Svararsson setti fundinn kl. 20:08 Jón tilnefndi Rúnar Ívarsson fundarstjóra og Pétur Valdimarsson fundarritara. Fundarmenn samþykktu það. Rúnar tók við fundi

2. Skýrsla stjórnar.
Jón Svarvarsson, form. flutti skýrslu stjórnar. Ræddi um að ýmislegt hefði verið í bígerð til að efla foreldrafélög en minna orðið úr framkvæmdum. Foreldraröltið hafi þó verið öflugt. Sagði að mikilvægt væri að halda áfram öflugu foreldrarölti. Námskeið fyrir foreldra var haldið af Hróbjarti Árnasyni. Heimasíðan komst í gagni og hefur formaður haldið utan um hana. Þar er hægt að fá upplýsingar um hvað félagið er að gera ásamt upplýsingum um einstaklinga í foreldrafélögum og foreldraráðum. Samkóp gaf umsögn um samning Kópavogsbæjar og foreldraráð Kópavogsskóla. Einn fulltrúaráðsfundur var haldinn. Nauðsynlegt er að blása lífi í samstarf foreldra í Kópavogi.

3. Skýrsla gjaldkera.
Pétur Valdimarsson, gjaldkeri, fór yfir stöðu fjármála. Vegna góðrar stöðu var ekki farið í það að innheimta aðildarfélagsgjald á starfsárinu. Staðan á reikning félagsins þann 15. nóv. 2005 var 499.735 kr og inn í þeirri upphæð er 150.000 kr. sem eru eyrnamerktar til forvarnarstarfs.

4. Umræður um skýrslur stjórnar og gjaldkera.
Engar umræður urðu um skýrslu stjórnar. Reikningar félagsins voru samþykktir einróma.

5. Lagabreytingar
Pétur Valdimarsson kynnti lagabreytingar. Nokkrar fyrirspurnir komu um lagabreytingarnar og svaraði Pétur þeim. Fundarstjóri gerði grein fyrir kynningu á lagabreytingum í fundarboði og á heimasíðu félagsins. Hann fékk leyfi fundarins til að bera lagabreytingarnar upp í heild sinni og voru þær samþykktar einróma.

Lög SAMKÓP hljóða því svo;

1.gr. Félagið heitir SAMKÓP, samtök foreldrafélaga og foreldraráða við grunnskóla Kópavogs. Heimili þess og varnarþing er í Héraðsdómi Reykjaness.

2.gr. Markmið samtakanna eru: a) að standa vörð um réttindi grunnskólabarna til menntunar og þroska b) að beita sér fyrir auknum áhrifum foreldra á skólastarf c) að stuðla að skipulegu samstarfi aðildarfélaganna d) að vera sameiginlegur málsvari foreldra gagnvart sveitarfélagi og stjórnvöldum

3.gr. Markmiðum þessum hyggjast samtökin ná meðal annars með því:

 a) að fylgjast með framkvæmd grunnskólalaga og aðalnámskrár og beita sér fyrir umbótum í skólastarfi

b) að afla reglulega upplýsinga um starf foreldrafélaga og foreldraráða og miðla þeim c) að stuðla að opinberri umræðu um skóla- og uppeldismál, m.a. með ársþingum, félagfundum, málþingum, ráðstefnum, greinaskrifum og myndun starfshópa d) að starfa með öðrum samtökum og félögum sem sinna málefnum barna og foreldra á Íslandi og í nálægum löndum í samstarfi við Landssamtökin Heimili og skóla.

4.gr. Aðild að SAMKÓPI eiga foreldrafélög og foreldraráð í grunnskólum Kópavogs. Aðilar greiða árgjald sem ákveðið er á aðalfundi og er miðað við eitt árgjald á hvert aðildarfélag. Hvert foreldrafélag tilnefnir einn fulltrúa og annan til vara í fulltrúaráð SAMKÓPS. Hvert foreldraráð tilnefnir einn fulltrúa og annan til vara í fulltrúaráð SAMKÓPS. Ráðið kemur saman tvisvar á ári og oftar ef þurfa þykir.

5.gr. Aðalfundur skal haldinn í maí ár hvert og skal boða til hans með minnst sjö daga fyrirvara. Fulltrúar skulu boðaðir skriflega. Aðalfundur er löglegur ef löglega er til hans boðað. Á dagskrá eru venjuleg aðalfundarstöf og önnur mál. Allir foreldrar grunnskólabarna í Kópavogi eiga rétt á setu á aðalfundi með málfrelsi og tillögurétti. Vægi atkvæða er eitt frá hverju foreldrafélagi og eitt frá hverju foreldraráði hvers grunnskóla í Kópavogi. Einfaldur meirihluti ræður úrslitum mála, sbr. 8.grein.

6.gr. Stjórn SAMKÓPS skal skipuð formanni, ritara, gjaldkera, að minnsta kosti tveim meðstjórnendum og tveim varamönnum sem kosnir eru á aðalfundi. Kjósa skal sérstaklega formann á aðalfundi en stjórnin skiptir að öðru leyti með sér verkum. Kjörtímabil er eitt ár. Stjórn skipar fulltrúa foreldra í skólanefnd Kópavogs og einn til vara. Fulltrúi foreldra starfar eftir erindisbréfi sem samþykkt er á aðalfundi. Einnig skal kjósa tvo skoðunarmenn reikninga.

7.gr. Aðalfundur, fulltrúaráð og stjórn geta skipað starfshópa til að sinna sérstökum málum sem upp kunna að koma.

8.gr. Lögum þessum verður aðeins breytt á aðalfundi með samþykki 2/3 atkvæðisbærra fundarmanna, enda hafi tillögur um lagabreytingar verið kynntar í fundarboði. Breytingartillögurnar verða að berast stjórn fyrir 15. apríl ár hvert.

9. gr. Verði samtökunum slitið verða eignir þeirra varðveittar á reikning hjá Kópavogsbæ þar til sambærileg samtök taka til starfa innan sveitarfélagsins og 2/3 grunnskóla sveitarfélagsins samþykkja.

6. Kosningar til stjórnar
Eftirtaldir voru kosnir í stjórn Formaður; Hrefna Gunnarsdóttir (Hjallaskóla) Meðstjórnendur; Jón Svavarsson (Smáraskóla), Pétur Valdimarsson (Lindaskóla), Tryggvi M. Þórðarsson (Kópavogsskóla), Rannveig H. Ásgeirsdóttir (Snælandsskóla), Jóna Guðný Eyjólfsdóttir (Hjallaskóla) og Jóhanna Baldursdóttir (Hjallaskóla).

Skoðunarmenn reikninga voru kosnir; Ari Þórðarson (tilnefndur af Tryggva M. Þórðarsyni) Kópavogsskóla og Karl Otto Schiöth (tilnefndur af Jóni Svavarssyni) Smáraskóla.

7. Ákvörðun um aðildarfélagsgjald
Samþykkt var að aðildarfélagsgjald verði óbreitt kr. 20 á barn. Rannveig kom með tillögum um að SAMKÓP greiði síðan u.þ.b. 50% aðildarfélagsgjaldsins til Heimili og skóla sem mundi þá veita félaginu og grunnskólum aðild að samtökum Heimili og skóla.
Fundarstjóri bar upp tillöguna og var hún samþykkt.

8. Önnur mál..
Tryggvi kynnti foreldrasamningin sem Kópavogsbær gerði við foreldraráð Kópavogsskóla.
Hrefna kynnti nýstofnað fulltrúaráð Heimili og skóla og velti upp ýmsum hugmyndum varðandi framtíðarverkefni SAMKÓP.
Miklar umræður urðu um ÍTK og aðkomu þeirra að félagsstarfi í grunnskólum. Fundarmönnum fannst eins og ÍTK vildi aðeins sinna unglingastiginu. Nauðsynlegt er að grunnskólar geti boðið öllum upp á gott félagsstarf.
Rætt var um að fá fulltrúa stjórnmálaflokka á fund með foreldrum fyrir kosningar í vor eins og hefur verið gert við tvær síðustu sveitastjórnarkosningar.
Jón sagði fá því hvernig Samkóp starfaði í nefndum og skoðað ýmis mál og komið með tillögur til bæjaryfirvalda á upphafsárum samtakanna. Fundarmenn voru sammála að eitthvað svipað mætti gera.
Nokkrar umræður urðu um styttingu framhaldsskóla og hvaða áhrif það hefði á grunnskólann. Fundarmenn voru á því að ekki ætti að stytta framhaldsskólann heldur að styrkja þau úrræði sem væru fyrir hendi.
Brottfall í íþróttum og styrkir bæjarins til íþróttafélaga ræddir. Fundarmönnum fannst að styrkirnir ættu að ná til allt að 16 ára barna og einnig vera til annarra tómstundastarfsemi í bæjarfélaginu.
Jón þakkaði samstarfið á síðastliðnum tveim árum sem formaður og sagðist hlakka til að fá geta starfað áfram sem stjórnarmaður. Fundarmenn þökkuðu Jóni fyrir formennsku síðust tveggja ára.

10. Fundi slitið.

Fundarstjóri sleit fundi kl. 22:05.

Fundarritari, Pétur Valdimarsson